السادة المجلس الأعلى للقوات المسلحة

إيماناً من جلالتنا البهية بأهمية التواصل مع كل من عنده إنترنت وعنده صبر يستحمل أمثالي و رغبة منا في الاختصار المخل و المربك حفاظاً على وقت جميع أنسجة و أطراف بلدنا حكومة و شعباً فارغاً فسيحاً للمزيد من اللهاث خلف سيارات الطرق السريعة تلاحظ الآتي:

السادة المجلس الأعلى للقوات المسلحة المصرية:

–         قيام جهات المحاكمة المتعددة في مصر بتطبيق معايير عدالة عوراء ولا ترضاها الأنفس السوية. محاكمة رموز النظام القاتل المغتصب مدنياً بتهم التكسب الغير مشروع بينما يتم الزج بشباب الثورة مع مسجلي الخطر و البلطجية في محاكمات عسكرية غير عادلة يبدو كتنكيل بمن قاموا بالثورة و رغبة قوية في إخراس هذه الأصوات المتصاعدة للنقد الذاتي الداخلي لمديري البلاد و هو ما يحدث فتنة و وقيعة بين الشعب و درعه.

–         تلاحظ لدينا تخبط واضح في إدارة المرحلة الانتقالية للبلاد لا سيما مسألة تأسيس دستور جديد للبلاد. الغموض الكثيف المحيط بنية المجلس أو حتى وضوح خطته في مسألة الدستور و معنى الاستفتاء الذي تلاه “حوار وطني” غير ملزم وغير ذو أهداف واضحة يبعث على الريبة. هل يكتب دستور مصر القادم أغلبية نيابية معينة تتخذ الصناديق ترساً لصد أي توافق وطني على العقد الاجتماعي الجديد؟ تساؤل يظل عالقاً متخبطاً مع مجلسنا الموقر.

–         نهيب بالسادة المجلس الأعلى للقوات المسلحة مراجعة السياسة الاقتصادية للمرحلة الراهنة و مدى اعتمادها على الاقتراض المسرف من القوى الاستعمارية و الظلامية المتربصة بالثورة و مستقبل الديموقراطية في مصر. و نلفت نظر سيادته إلى أن الأزمة الاقتصادية قد يكون حلها سياسة تفشفية حكومية و حد أقصى و أدنى للأجور وضرائب تصاعدية و سياسة صارمة مع رجال الأعمال الذين امتصوا دماء عمال مصر لسنوات طويلة في ظل خصخصة دمرت مقدرات الوطن و المواطنين.

السادة النشطاء:

–         شوف يا نجم… البقين بتوع المجلس الرئاسي و الثورة على الجيش ما بياكلوش عيش في الشارع سعادتك. و لو بطولتك و استبسالك في الثورة دفعوا المواطنين دفعاً للوقوف بجانبك لازم تبني على الكلام ده و ما تهدش. الفجوة اللي بتتسع بينك و بين الشارع و اللي بيملاها قوى لم تكن أبداً ثورية ولا رافضة للظلم بالطبطبة على مشاعر الفقراء وتحميلك مشاكلهم هاتبلع فخامتك سريعاً مالم تتوقف عن التشتت و الزرط و اختيار المعارك الخاطئة.. هارش؟ لسانك حصانك ان صنته صانك و ان مش عارف إيه كده… انت حر

السادة الأحزاب:

–         إن مقتضيات تحرير البروليتاريا و اطلاق يد السوق الحرة مع الحفاظ على الهوية الإسلامية تتطلب من سيادتكم التوقف عن التعريص السياسي. لأن لحس الأحذية لن تكون سياسة التيارات التي ستقود المصريين بعد أن استردوا كرامتهم. ولأن التراشق اللفظي بدون تقديم مشاريع حقيقية أصبح أمراً مثيراً للقرف و العزوف عن الممارسة السياسية أصلا. جتكم القرف

السادة الإخوان المسلمون:

–         إنما أهلك من كان قبلكم أنهم إذا انهال عليهم النقد يمنة و يسرة قالوا إنما هو دليل على حيوية الجماعة/الحزب و قوتها و تأثيرها في المجتمع. عدم الالتفات للنقد يؤدي بالضرورة لجمود الفكر و تصلب الرأي و هو أول خطوات الاضمحلال و الذوبان.

–         ندري تماماً أن الحفاظ على الجماعة هو الأمر المسيطر على مركز العقيدة لدى سيادتكم، و لكن نهيب بكم أن تظلوا ملتحمين مع المطالبين بالحريات العامة و العدالة الشاملة التي جلبت ممارساتكم للنور في ثورتنا المباركة. إن عزوفكم عن مشاركة هؤلاء الدعاة للحرية مرة بعد مرة ينقص من رصيدكم ويثير هالة مقرفة من البراجماتية السياسية حول تنظيمكم المقدس.

السادة شعب مصر:

–         مساء الأنوار البهية على عيونكم يا شعب نضيف. إيه؟ إيه بقى؟ مالكم كشيتوا كده؟ سمعتوا كل بق فاضي بيجعجع في تليفيزيون و رجعتوا لورا كده ليه و اتهتيتوا؟ مش لونكم يا مصريين… ياما قالولنا هاتخرب قولنالهم خربانة خربانة. ياما قالولنا هاتجوعوا قولنالهم ماحدش بيبات من غير عشا ف بلدنا. اطمئنوا بالله كده و سمّوا و كملوا على البركة… هاتكمل و هاتحلو و هاتبقى زي الفل. و مافيش خراب جاي.. الخراب هايبقى على السفلة و الفاسدين اللي سفحوا دمنا و قوتنا. هاتنضف و هاتتصلح بإيدينا. بس عاوز اقول كلمة في سركم:

1-     أول هام.. أوعى ترجع لورا.. إوعى حد يضحك عليك و يقوللك تعالى اركبك القطر و تروح معاه كده مغمض. ماحدش يسوق القطر غيرك

2-     مش هانموت من الجوع علشان بنطالب نطهر البلد من الفاسدين. انزل و ماتخافش. المجلس العسكري ماعندوش أي آلية يعرف بيها إنه الشعب عاوز يعمل كذا أو كذا غير بالتظاهرات الضخمة… معلش.. هانفضل كده حبة لحد ما ننظم مجلس نيابي و نقابات حرة تعبر عننا قبل ما ننزل مظاهرات.

3-     مش عيب كل بالونة نجري وراها كده؟ ده منظر؟ ده صوت؟ إيه اختي زفتة و إيه سولار و إيه العوء ده يا رجالة؟ يا رجالة ده احنا اللي العالم بيتباهى بينا و يقلدنا في كل خطوة النهاردة… المصري اللي على حق يقول للعوء لأ.

هذا…

و الله الموفق و المستعان و صاحب الفضل و المنة. و هوه اللي أذن.. و هوه اللي هاينصرنا. و هوه اللي هايجعل كيدكم في نحوركم. و هوه اللي هايفتت مؤامراتكم و هاينجي المظلوم اللي ما بينامش يا ظلمة.

طظ

محجوب عبد الدايم

مصر… 2011


4 thoughts on “السادة المجلس الأعلى للقوات المسلحة

  1. محجووووووووووووووووووووب بيكتب مجدداً!!!!!!
    تصدق يا ابني ان انا لما شفتك كاتب حاجة جديدة فرحت جداً!! أصلك خطرت ف بالي و انا بقرأ و بتابع مجريات و تطورات الثورة و قلت لنفسي أما تروحي يا بت تشوفي الواد محجوب كاتب ايه اصله بيكتب كلام يفتح النفس…
    و اهه… الحمد لله…
    جيت و لقيت حد بيتكلم عن الثورة كما يجب ان يكون عنها الكلام!
    هو مين يقدر يعمل كده الا الواد محجوب🙂

    1. إيه ده؟ تعليق؟ الله أكبر.. باينها بتندّع .. ههه. ده انا داخل النهاردة باقول اما اتفك بكلمتين ف الصفحة اللي ماحدش عاد بيقراها. كتر خيرك و الله كويس انه فيه حد فاكرني

      1. لا طبعاً فاكراك🙂 و بفتح مدونتك كل فترة اشوف جديدك… (كل فترة يعني كل اربع خمس اشهر كده)

        اصل فيه ادمغة عادية، و فيه ادمغة الواحد يحس انها اضافة ايجابية للحياة…

        عارف؟ انا اتمنى ف يوم اشوف ليك كتاب! بس احلّفك لو عملت كتاب و نشرته باسمك الحقيقي تدينا فيه اي اشارة انك انتَ محجوب عبد الدايم بتاع الطظيات🙂

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s