الوصلة ليه؟|إنترنت بلا حدود

الوصلة ليه؟

سؤال برئ جداً، الإجابة الأكثر براءة بقى، بعيداً عن ارتفاع الأسعار، و استشراء النزعات اللاسلطوية بين طبقات الشعب المطحون، و ما إلى ذلك… خلينا نفكر ببساطة… و بتسطيح

مصر فيها تلات أنواع من خطوط التليفون، على قد معرفتي المحدودة.

الخط الأرضي

الخط الأرضي مركزَّات

الخط الهوائي

و فكرة الخط الأرضي مركزات، و الخط الهوائي هيه ذات نفسها فكرة الوصلة، بس الفرق إنها حكومية. يعني ببساطة، الحكومة حبت إنها توصل الخدمة لبيوت كتير، لغرض أو لآخر. و بما إن البنية التحتية اللي عمالين يرسموا علينا بيها مضروبة بالنار، و ميتة من زمان، فالحل إنك تعمل حاجة زي الوصلة دي بالظبط. يعني تعمل سويتش كده، و يطلع منه خطوط كتير، تغطي منطقة كبيرة. أو تعمل مصدر بث هوائي، يعمل نفس الحكاية.

إيه ده؟ يعني الحكومة بتوزع خطوط التليفون بشكل “غير شرعي” على نظام الوصلة؟ آه شوفت بقى؟

النكتة بقى، إنه –زي الوصلة تمام- خطوط التليفون الأرضي مركزات و الهوائي تعتبر الأكثر انتشارا في مناطق مصر العشوائية- قصدي يعني في معظم أنحاء مصر. و تعتبر شايلة معظم الحمل عن البنية التحتية المخرومة.

أما بقى عن الأكثر طرافة، فإن هذه الأنواع من الخطوط لا يمكن تحميلها بخطوط الإيه دي إس إل.

إيه؟ زي ما سمعتني كده… ما بينفعش

أمال سعادته ازاي بيطالبنا نسيب الوصلة، و نركب مباشر من سنترالاته الخربانه؟ إذا كان أساسا ما ينفعش، و اذا كان أساسا هوه بيستعمل نفس نظام الوصلة في خطوط التليفون. و على العكس من وصلة الإنترنت… وصلات التليفون بتاعت جنابه بقى، بتأثر على جودة الخدمة.

همم؟

عرفتوا الوصلة ليه؟

الوصلة كمان و كمان…

مع احتقاري الشديد ليوسف شاهين

طظ في جنابه… يوسف شاهين يعني هيهي

محجوب عبد الدايم

القاهرة 1930.


9 thoughts on “الوصلة ليه؟|إنترنت بلا حدود

  1. تفكير سليم
    بس هما حكومه واحنا شعب
    يعني اللي بيعملوه صح واللي بنعمله غلط ميصحش وعيب

    والكحكة في ايد اليتيم عجبه

    لك الله يا مصر
    امتى هيجيلك اليوم اللي يدير امورك ناس بتفهم
    تقريبا دا بقى من المستحيلات

  2. هو أنا باختلف معاك في نقطة الوصلة بس.. لأن الوصلة مش مسألة تقنية.. هو بيتكلم فيها من جهة قانونية.. هما الشركة من حقهم يمدوا وصلات.. إنما بدون إذن الشركة احنا من حقنا ولا لأ.. الله أعلم..
    الصراحة العقد بتاع الدي اس ال كتابته زفت خالص مش بتدينا أي حقوق خالص ولا حتى ضمان لجودة الخدمة
    بس فعلا خطوط الفايبر دي… الناس المفروض يعملوا فيها إيه؟؟؟
    مش فاكر كنت قريت فين لما حد اتصل بالشركة قالوله يا إما تمدلك خط أرضي هيتكلف 40 ألف جنيه يا إما تستنى لما يبقى في خطوط أرضية
    طيب يعني مادام ممكن يمدوا خطوط أرضية.. ما يمدوها ويريحونا
    ولا خايفين ع الشوارع من الحفر اللي المياه والكهرباء والغاز عاملين على الشوارع دورية حفر وبيبدلوا مع بعض كل شهر؟؟؟؟

  3. هو محجوب جاب الكلام من الاخر يا جماعة
    المشكلة ان غالبية مشتركين التليفون يا اما خط هوائى يا اما السنترال اللى هما تبعه مش اليكترونى اساسا ولا حتى نص اليكترونى بيقولوا عليه حاوية
    يعنى مينفعش اساسا انك تشترك فى خدمة الدى اس ال حتى لو معاك فلوس تدفع فمش هتعرف
    يبقى قبل ما سيادته يقول نظام جديد فى الدفع يبقى جنابه يعمل الشغل اللى المفروض يعمله و يعمل حاجة اسمها بنية تحتيه الاول

    و ده يشرح اذا كان ده من حقنا ولا مش من حقنا
    يعنى مافيش طريقة غير الوصلة اللى بيمدها واحد من اخر المنطقة السكنية و اللى تبع سنترال تانى لغاية بيت الواحد و بياخد فلوس مقابل كده
    الراجل بيشترى خطين تلاتة سرعة اتنين ميجا و بيدفع فلوس للشركة طبعا هيوصل ليك الخط و انت بتعمل داونلود هتلاقى اخره اربعة او عشرة كيلو يعنى هو قسم الخدمة
    دلوقت لو انا اشتريت لتر بيبسى و بدل ما اشربه كله لوحدى و اعمل دماغ بيبسى جامد رحت مدى لواحد معدى فى الشارع كباية و قلتله تمنها ربع جنيه يبقى انا كده خالفت قانون تنظيم شرب البيبسى ؟
    و لو الراجل اللى معدى عطشان قوى ماهو هيشترى لتر بيبسى لوحده و يشربه و يتمزج بدل ما يتزل لخلق الله و يجيله واحد يحطله شاليموه فى الكباية بتاعه

  4. انا عارف المشكلة اللي انت بتقول عنها. واحد صاحبي ف القاهرة الجديدة متعذب بسبب حكاية النت دي لأن هناك الخطوط هوائية

  5. بسم الله الرحمن الرحيم
    السلام عليكم ورحمة الله وبركاته
    اريد ان اوضح ان شبكات التليفون قى مصر ثلاثة انواع فعلاً.
    1-شبكة ارضيةوهى الأكثر انتشاراً
    2- شبكة خلوية “المحمول”مملوكة لثلاثة شركات
    3-شبكة هوائية وهى تابعة ايضاً للمصرية للأتصالات
    ولكن لم نسمع ابداً عن شبكة المركزات التى تحدثتم هنها.
    ولن اطيل عليكم يا اخى اتقى الله واحمده واشكره وادهو الله ان يديم علينا نعمه وان يديم عليك الحرية التى جعلنك تعبر عن رأيك بصراحة وبلا خوف .وادعو لمصر وفائدها بالتفدم والرخاء .
    مصرى وطنى مجاهد

  6. سيادة الـ “مصري الوطني المجاهد” … بجد أسعدتني. نموذج و الله

    أما تعيش في الأقاليم سعادتك، ولا في القرى بتاعت الأقاليم، هتبقى تعرف يعني إيه مركزات. مين هوايل بقى (دي انجليزي .. معناها في الوقت الراهن)… حضرتك تتلهي و تقعد في ركن. حرية الهبهبة و الكلام و اللت؟ هيه دي الحرية اللي حضرتك بتتكلم عنها؟

    بني آدم عبقري الصراحة… قال حرية قال

  7. هناك من يستبيح لنفسه اهدار كرامة هذا الوطن، وهناك من يقبل بيع الوطن بمبلغ زهيد ، ولكن ايضاً
    يوجد شرفاء قادرون على حماية الوطن من الجبناء والضعفاء .
    وحماك الله يامصر.
    مصرى وطنى مجاهد

  8. فعلاً، هناك من يستبيح اهدار كرامة هذا الوطن بإهدار كرامة مواطنيه و سلبهم أبسط حقوقهم لصالح طبقة حقيرة من المختلسين و اللصوص، و هناك من يبيع الوطن بثمن غالٍ جداً في المزاد العلني… واخدلي بالك يا روح خالتك؟؟

    يوجد برضه شرفاء ماشاء الله.. كما يوجد بائعي فجل و حمص بطنطا… و يوجد ماء مجاري بينزل من فتحة الدش… دي من حقائق الكون

    أما بقى عن مصر اللي ربنا هيحميها غصبن عنك و عني… فاحنا سايبينها و ماشيين، و بكرة تتف على “الوطني” اللي عاش على قفاها عيرة

  9. انت قبل ما تمنع حاجه لازم توفر الحل البديل لها يعني تيجي وتقول اللي هيعمل وصله هيحصل فيه كذا وكذا….طيب يا حكومه حاضر مش عامل وصله وهمشي قانوني … روحت اقدم على النت وانا من سكان القاهره من الحدائق ومش منطقه عشوائيه ولقيت تليفوني هوائي … اديني ماشي قانوني يا حكومه طيب اعمل ايه ..اه قدم طلب تغير الخط من هوائي الى ارضي حاضر كتبت الطلب من اربع سنوات …روحت السنترال تاني بعد 4 سنوات قدم تاني طلب حاضر والى الان مضى 6 سنوات ولم يعبرني اي احد بالقبول او الرفض … والله ده اللي حصل … بس انا قبل ما كنت اقدم الطلب الاولاني كنت واخد وصله اصلا …هههههههههههه . لاني عارف كله ده كان هيحصل … صباح الخير يا مصر

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s