استطلاع رأي؟|إنترنت بلا حدود

استطلاع رأي؟ أخيراً؟ الحكومة بتاعتنا قال إيه، عاوزة تعرف رأينا في القرار.. تخيلوا؟؟؟

همم، مين اللي لسة ما فقدش القدرة على الاندهاش؟ مش المفروض استطلاع الرأي ده كان يعلن عنه قبل ما القرار يعلن عنه بالشكل المتخبط و العاجز ده؟ مش بعدها بتسعة أيام؟

“شارك برأيك

 

 

 

إستراتيجية أسعار البرودباند الجديدة تعود بالنفع الاكثر على:

المشتركين

مفدمى خدمات الانترنت

الفئتين معا

لا يوجد خيار من الاختيارات السابقة”

 

 

حضراتكم طبعاً عارفين تضغطوا فين علشان تعرفوا سعادته رأينا في القرار. لأنه يبدوا إنه ما يربوا على الخمسة آلاف توقيع على صفحة مش جايب و اللي حصلوا في الأربعة أيام الماضية لا يقنعون سعادته كثيراً.

 

استطلاع الرأي ده بقى حضاراتكم طالع قبل معاد استضافته في برنامج البيت بيتك يوم السبت القادم الساعة ثمانية و نصف تسعة بالليل كده بيومين أهه. يا ريت كلنا نقف إيد واحدة كمان المرة دي.

 

و ده الإيميل اللي المفروض تبعتوا عليه أسئلتكم تاني علشان اللي نسي

 

saad.mashakel@gmail.com

 

و لسة مش طظ…

 

محجوب عبد الدايم

 

القاهرة 2007.

 


16 thoughts on “استطلاع رأي؟|إنترنت بلا حدود

  1. والله ايه

    دول اكيد بيهرجوا

    بعد مااتزنقوا وحسوا ان الناس ناوية تقاطع فعلا عاملين الحكاية برو عتب وقال ايه ادينا بناخد رايكم

    جاتهم القرف في استطلاعاتهم

    مجهزين نفسنا جنب التليفون وح نهريهم اتصالات في برنامج البيت بيتهم

  2. الصراحه يا حاج الوزير انا لو منك اموت من الكسوف
    يعني استطلاع الرأي ده على موقعك ومحدش نصفك غير 2 اكيد انت واحد منهم والتاني السكرتير بتاعك
    عموما اتمنى اللي يتصل بالحلقة بتاعة السبت يبقى يفكرهم باستطلاع الرأي ده ويخليه يقرا النتيجه على الهوا
    ——
    على فكره انا بعت رساله لمحمود سعد
    الصراحة الراجل ممكن يموت من طولها قبل ما يقراها
    وحطيت فيها كل التفاصيل بتاعة مشاكلنا
    معتقدش ان محمود سعد لو قراها هيحتاج يعد الحلقة او يعمل بحث من اي نوع
    وطبعا مستر محجوب وافق عليها واداني ختم الطظ ( ولا ختم اللي مش طظ حسب شعاره في حملتنا دي)
    قبل ما ابعتها
    ادعو الله انها توصل لأيده وتتحط قدام الوزير عشان يحس ولو لمره في حياته بحجمة الحقيقي

    وعلى رأي محجوب
    مش طظ
    واحنا صوتنا بيوصل
    وبيتسمع
    وغصب عنهم هيتسمع
    ومش جايب
    ومحدش هيغصبني اجيب

    وربنا معانا

  3. تفتكرو اختار اي من الاتنين؟ “مقدمي الخدمات” ولا “لا يوجد خيار من الاختيارات السابقة”؟
    انا بصراحة شايف ان “لا يوجد خيار”، لأنه لو اتنفذ هايتخرب بيت شركات مقدمين خدمات الانترنت من كتر تقطيع العقود وبعد كدة هايقلبوها شركة بيع “خيار”😀

  4. مش طظ
    واحنا صوتنا بيوصل
    وبيتسمع
    وغصب عنهم هيتسمع
    ومش جايب
    ومحدش هيغصبني اجيب

    وربنا معانا

  5. نتائج التصويت على موقع المصرية للأتصالات حتى الأن

    إستراتيجية أسعار البرودباند الجديدة تعود بالنفع الاكثر على:
    المشتركين 0% | 19
    مفدمى خدمات الانترنت 86% | 3421
    الفئتين معا 0% | 22
    لا يوجد خيار من الاختيارات السابقة 12% | 484
    الإجمالي : 3946

    شدو حيلكو يا رجالة

  6. الوزير خلع النهارده من البيت بيتك
    الظاهر ان حس بالهزيمه
    بس انا سمعت انه عمل تصريح في جريدة الجمهورية وقال فيه بقين واسعين من اياهم
    المهم انه لغاية دلوقتي مصدق نفسه
    دا من جريدة الجمهورية السبت 28/7
    ——————————————–
    أوضح د. طارق كامل وزير الاتصالات انه من حق الحكومة توجيه الدعم الاضافي للشرائح المستحقة بالنسبة للخدمة التليفونية ويمثلها المشتركون في الانترنت فائق السرعة الذي خفض الاشتراك الي 45 جنيها شهريا مع اطلاق المنافسة علي باقي السرعات للشركات وتمكينها من تقديم عروض ترويجية وتخفيضات خلال الفترة المقبلة.
    قال ان هدف التخفيض مواجهة الوصلات المنزلية غير الشرعية التي تؤثر علي جودة الخدمة وخدمات القيمة المضافة وقال عدد المشتركين الحاليين بلغ 300 ألف مشترك بينما تجاوزوا في الحقيقة المليون.
    ——————————————

  7. تحديث

    نتيجة التصويت

    التاريخ : يوليو 25, 2007
    إستراتيجية أسعار البرودباند الجديدة تعود بالنفع الاكثر على:
    المشتركين 0% | 53
    مفدمى خدمات الانترنت 88% | 8171
    الفئتين معا 0% | 66
    لا يوجد خيار من الاختيارات السابقة 10% | 993
    الإجمالي : 9283

  8. وبرنامج اليوم السابع برضه ماجاش في ظروف غريبة..
    انا مش متابع البرنامج بس كنت فاكر انه بييجي الجمعة.. ماجاش ومش كتوب في الEPG لا الجمعة ولا السبت.. وموقع ام بي سي الجديد ده انا مش عارف اطلع منه حاجة :s

  9. 1-مقاطعة عامة للاشتراك الجديد

    2-الحملة على النت مقضياها كتابة مفيش فيديو الا بتاع القاهره اليوم فين الفيديوهات والمديا فين اليوتيوب فيديوز الاوديهات ؟؟؟؟؟

    3-فين اللغات التانية ؟؟؟ انجليزى فرنساوى المانى الخ
    انتم نسيتم ان الاجانب اللى فى مصر بيشتركوا زينا برضة ؟؟؟ اظن من حق السياح والزوار والاجانب من سكان مصر معرفة التفاصيل

    مش عارف لما يعرفوا انهم هينزلوا سياحة مصر ولو خدو شقة بره يبقى مفيش نت ….يعنى يقضوها فنادق!!!!!!!!!

    4-الشركات العالمية ؟!!
    القرار الجديد بيقطع خدمة المديا 2
    باختصار البودكاستس البرودكاستس والفودكاستس
    يعنى تقفل مواقع المديا 2.0 وتقفل جهازك وتنام تقريبا هدفهم يسيبونا متخلفين

    5- حصار اقتصادى وفكرى وثقافى و علمى واخلاقى
    مش كفاية انهم محاصرينا فى تعليمنا لا كمان بيحاصروا النت اللى بنتعلم منه ….يعنى عايزنا نطلع جهلة
    الدكتور ميقدرش يتابع الجديد مالتميديا فيديو اوديو او خلافة
    الطالب ميقدرش يجيب دروس تعليمية من النت
    اللى بيشتغل فى البرمجة او التصميم ينسى الستريمنج والسكرينكاستس

    مش مكفى البهايم اننا بنستقبل بس لا عايزين يمنعونا ننتج كمان ؟؟

    7-التواصل مع الاصدقاء الاجانب :
    مش عارف كل واحد بيتنطط عنده اصحاب اجانب عارف اجانب …وتقريبا الاجانب دول كلهم عندهم بلوجات وشغالين على مواقع المديا ؟ والسؤال هم مالهم ؟؟؟؟
    لا مالهم ونص اولا هم اصحابك ياخدوها ضريبه
    ثانيا العالم عزبةصغيرة ولازم يعرفوا مشاكلك ويتابعوك ويساعدوك تنشر الكلمة
    ثالثا وهو الاهم اصحابك ( وصاحباتك ) الاجانب دول لازم يعرفوا انك هتبقى تدخلهم من سيابر ومش هيبقى عندك نت لازم يعرفوا السبب
    وصراحة لو مبانوش فى الوقت ده يبقى مش اصحاب …
    اطلب منهم كل واحد يقول رأيه …فى المدونة بتاعته او الموقع بتاعة او يطلعة فى فيديو على اليو تيوب

    8-قايمة بكل برامج التلفزيون اللى ممكن تهتم بالموضوع وايميلاتها وتتبعت للمنتديات والبلوجات
    صراحة انتم بتدلعوا ….
    الموضوع عايز الناس العادية تفهم وناس بتفهم تفهمهم الموضوع ده …

    9- فيه المدونات بتعلق بانرات بس !!!
    ليه الناس مبتقلش رأيها فى الموضوع فى بوست ؟!! ولا المشاركة بقت سلبيه للدرجة دى علق بنر كده انت بتشارك

    10- الاسبوع اللى فات والتعلب مات مات :
    شركة توزيع ايه دى اس ال اقنعت العميل ان الموضوع مفيهوش مشاكل …. وكان فيه شباب رايحين يقاطعوا ويعلنوا مدخلوش ؟؟؟ ليه مش عارف
    الشباب المفروض يروحوا للشركات يكلموهم ويكتبوا عن الزيارة على البلوج باسم الشركة وايه اللى حصل
    عشان نعرف اللى حصل كويس

    11- عايزين الموضوع يمشى صح
    لازم صوتكم يتسمع بره مصر
    وحتى الان بنسمع همس
    القطة حتى بتخبش
    واحنا بنخاف من اللمس

    مش عارف ليه الناس بتتحرك ببطء والاسر الجديدة السوق بتاعهم الجديد ده لازم يعرف كويس ايه المستنية

    السؤال الآتى هل الدكتور المحترم هيستخدم النت محدد السرعة ؟!!!!

    لا طبعا ده عنده انترنت ستالايت

    السؤال ولادة وفلذات اكبادة هيستخدموا الانترنت محدد السرعة ده ؟؟؟؟؟
    لا طبعا استغفر الله ازاى ده للعوام بس

    ملاحظة صغيره الحكومة مش هتاخد
    بالتصويتات ولا هتاخد بكلام البلوجات
    الحكومه والقرار هيرجع بخوف الحكومة على صورتها قدام العالم

    =====================================
    مثال صغير

    جامعة العاشر من رمضان مانعة النت فى المدينة الجامعية
    العيال معملتش حاجة غير وصلات مسروقة
    لو الولد اللى هيدخل هناك عرف كده قبل مايتخزوق هناك مكانش راح العاشر اساسا

  10. دا تجديد بنتيجة التصويت

    التاريخ(بداية التصويت) : يوليو 25, 2007
    إستراتيجية أسعار البرودباند الجديدة تعود بالنفع الاكثر على:
    المشتركين 0% | 82
    مفدمى خدمات الانترنت 89% | 11844
    الفئتين معا 0% | 111
    لا يوجد خيار من الاختيارات السابقة 9% | 1191
    الإجمالي : 13228

    ————————
    اذا كان الوزير هيبص على التصويت يبقى النتيجه واضحه
    لو مكانش هيبص
    يبقى بيحطو ليه؟
    وفيه حد يعمل تصويت بعد اتخاذ القرار ؟!
    دا اسمه غباء سياسي

  11. ِبناءا على أوامر ضابط مرور حلوان : أنام على السرير فى البيت لابس خوزة !!!!!!!!!!!!!!!!!!!
    من حوالى شهر قمت بشراء موتوسيكل قديم مستعمل ماركة جاوا من أحد زملائى بمبلغ سبعمائة جنيه مصرى لاغير والسداد على أقساط ومعى عقد البيع وكل الأوراق المطلوبه للتراخيص ولم أقم بأنهاء التراخيص لعدم توافر نقود لأننى موظف بالحكومه ومرتبى يكفى مصاريف البيت ولا يفيض منه لأى مصروفات أخرى ولحين ميسره قمت بربط الموتوسيكل تحت البيت حتى لا أستعمله وأعتبر مخالفا للقانون وفى يوم الثلاثاء الموافق 1\7\2008 كنت بالمنزل فى حوالى الساعه الثانية ظهرا نائم……………!!!!!!! أقسم بالله العظيم نائم فى البيت واذا بالأولاد يصحونى وقالولى كلم ناس عايزينك تحت … نزلت لقيت ثلاثة عساكر ومعهم ضابط عرفت بعد كده أنه من مباحث مرور حلوان وأسمه الرائد \ ياسر فتح الله وسألنى عن الموتوسيكل قلت له حاضر أجيب لسيادتك الأوراق الخاصه به . قاللى هات معاك البطاقه وطلعت البيت جبت الأوراق والبطاقه ونزلت أخذ منى البطاقه وقام برمى الأوراق على الأرض وطلب منى فك الجنزير من الموتوسيكل وأخذنى أنا والموتوسيكل على قسم مرور حلوان وقام بعمل محضر من أربع بنود وهم :
    1: بدون خوزة….وأنا نايم فى البيت !!!!!!!!!
    2: بدون قيادة ….. وأنا نايم فى البيت !!!!!!!!
    3: بدون تسيير….. وأنا نايم فى البيت!!!!!!!!!
    4 : بدون لوحات معدنيه .
    والعرض على النيابه باكر .
    رحت نيابة مرور حلوان يوم الأربعاء 2\7\2008 قضت النيابه بغرامه ( خمسمائه وواحد جنيه ) وأقسم بالله العظيم كنت نائم فى البيت . وأسألوا الظابط اللى أخدنى ويحلف على مصحف أخدنى منين !!!!!!!!!!!!!!!
    هل هذا معقول ياساده…..
    مرتبى 600 جنيه يخصم منهم 185 جنيه قسط للبنك وأعمل بهيئة النقل العام منذ 30 عام وعمرى الأن 53 عام وأولادى كلهم فى الجامعات الحكوميه من أين لى بخمسمائة جنيه غرامه ؟؟؟؟؟؟
    هو اللى نايم فى البيت لازم يلبس خوزه؟؟؟؟؟؟؟؟؟؟
    كل ده عشان أنا مواطن درجه ثالثة ( ترسو )
    أروح لمين يرفع عنى هذا الظلم ؟؟؟؟؟؟؟
    حسبنا الله ونعم الوكيل

    محمود أحمد مدبولى
    موظف فى الدولة ( ترسو )
    تليفون\ 25523067
    العنوان .15مايو مجاورة 12حي ا عمارة 7 القاهرة
    ِ

  12. Please advise on how to get in touch with Mahmoud Saad, and Tamer and Khayri
    Thank you.
    Sorry,I am living in London, and my system can not use the Arabic language, but it can receive the Arabic language.

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s