ثم ينهمرُ|وزارة الاتصالات تتراجع|إنترنت بلا حدود

ده الفيديو العبقري بتاع حلقة القاهرة اليوم، و سيادة الوزير المحترم بيحاول يشرح النظام الجديد…

الخبر ده بقى لسة طازة النهاردة. أنا حاولت أجيب النص الأصلي من وكالة أنباء الشرق الأوسط بس اتضح إنهم بيبعتوا عميل من عندهم علشان يتمم الاشتراك المجاني… شوفتوا العبط؟ على العموم يبقى يقابلني في القصر الجمهوري بقى.

في الخبر طبعاً، يبدو إن الوزير تراجع عن جزء تاني من قراره، و هو إنه الخدمة تكون معممة على الجميع إجبارياً، و بيصرح بكل “وضوح” إنها موجهة لشريحة خاصة، و كلام من ده.

اللي مش واضح بقى سعادتك الآتي:

1- ماذا عن الناس اللي عاوزة تشترك بعد تطبيق النظام الجديد و عاوزين يتحاسبوا بالنظام القديم؟

2- حضرته بيقول إنه العقود السارية هيتم إحترامها و هيه مستمرة (حسب التعاقد). يعني إيه حسب التعاقد؟

3- فين تخفيض أسعار الإنترنت اللي حضرتك بتقول عليه؟ ما النظام هوه هوه، و ما فيش حاجة اتغيرت غير إخفاء نظام الساعات و تلبيسه عمة نظام الداونلوود المحدود. مش الكدب حرام برضه؟ تقول تخفيض و بعدين تزود السعر و عمال تلف و تدور؟ مش عيب سيادتك؟؟

على العموم كل اللي انتوا شايفينه ده نتيجة شغلكم إنتم، و حملتكم إنتم، انتوا اللي عملتوا كل ده، و في إيديكم تعملوا اكتر، و في إيديكم تاخدوا حقكم كاملاً. دي ثمرة مجهودكم اللي لسة ما اكتملش، مافيش تراجع، و مافيش تخاذل، و عفارم عليكم.

لسة التهديد بتاعنا قائم، و لسة بنجمع معلومات مهمة عن المسألة. احنا جادين جداً في مسألة المقاطعة. من حق كل مصري الحصول على خدمة حرة، و بسعر يناسبه. مش خانتلخبط بتضارب التصريحات، و مش هنتراجع إلا لما ناخد حقنا كامل. ربنا معاكم

مش طظ

محجوب عبد الدايم

القاهرة 2007.


7 thoughts on “ثم ينهمرُ|وزارة الاتصالات تتراجع|إنترنت بلا حدود

  1. انا نوعاً ما مش فاهم حاجة. بالنسبة للعقود الحالية اللي مش هاتتغير، العقود دي بتتجدد كل سنة، يعني بنهاية ديسمبر. يعني الاشتراكات بتاعتنا الحالية زي ماهي لحد ديسمبر اقصى حاجة. وده الكلام اللي قاله الوزير في برنامج عمرو اديب بالفعل.
    ينفع بعد ديسمبر العقد الجديد يجبرونا انه يتغير للنظام الجديد؟
    انا ملاحظ ان الوزير لحد دلوقتي مش بيقول اي حاجة جديدة غير انه عمال يفصل في كلامه القديم.. على العموم ده برضه اكيد بسبب الثورة اللي بتحصل، يعني احنا على الطريق الصح..

  2. اخشى مااخشاه اني دائما أحضر اخبار مش ولابد

    لقيت من شوية مدونة احلتني لمدونة وائل عباس فيها خبر غريب جداً عن الاسباب الخفية في العملة الهبابية والتصريحات البتنجانية دي

    الموضوع اهو وماحدش يقول اني مؤمنة بنظرية المؤامرة

    الموضوع اترمى في وشي وانا ماشية في أمان الله

    http://misrdigital.blogspirit.com/archive/2007/07/25/%D8%B1%D8%B3%D8%A7%D9%84%D8%A9-%D9%84%D9%84%D9%88%D8%B9%D9%8A-%D8%A7%D9%84%D9%85%D8%B5%D8%B1%D9%8A-%D8%AA%D9%83%D8%B4%D9%81-%D8%B3%D8%B1-%D8%AA%D8%AD%D8%AC%D9%8A%D9%85-%D8%A7%D9%84%D8%A5%D9%86%D8%AA%D8%B1%D9%86%D8%AA.html

    موضوع يفجر ماسوة من الاسئلة الشريرة
    هيهيهيهيهي

  3. المشكلة إن الناس بتتكلم من غير ما تفكر في كلامها كويس
    يعني اللي اتقال في الحلقة على شهر ديسمبر ده
    العقد بيتجدد حسب بدايته…. يعني أنا اشتركت في شهر مايو.. يبقى التجديد في مايو اللي بعده.. أصلها مش سنة مالية😀

  4. في مدونة لطيفة قوي عاملة حملة هي كمان

    http://no-dsl.blogspot.com/

    زمان الوزير بيخاف يروح يبات في بيتهم بعد الرعب اللى معمول له في كل مكان

    بعد ماكان نكرة وماحدش بيشوفه غير فين وفين دلوقتي صوره اتنشرت في كل حتة والحملات عمالة تلمع فيه

    تلميع ورنيشي خسارة في جتته نستهل عليه يعمل لنا الانترنت مجاني

  5. المهم يا جماعه ان احنا نستمر
    انا هعمل حركه كده ربنا يسهل فيها
    مش هقول هعمل ايه لغاية ما اعمله وانشره
    المهم اني اوصل لأي حاجه
    او اخد من الشركة بتاعة النت اي اثبات او اي حاجه تفهمنا الوضع

  6. ياريت ربنا يخليك
    وتعرفنا

    كل مانتصل بالشركة السخام اللى مشتركين فيها ماحدش راضي يقول لنا اي حاجة ومتكتمين على الخبر زي ايام مافكروا يعملوا الانترنت المجاني وارقام التليفونات الخابور اللى ضحكوا على الناس بيها وعملوا اجباري والخدمة اصبحت سيئة جدا وفواتير التليفونات ولعت

    نفس الموضوع بيتكرر وهم والشركات متفقين مع بعض علينا

  7. عايزين كلام واضح وصريح يطلع ابن بارم ديله, عمر بدوي , و طارق كامل,يقولو احنا أسفين يا شعب عشان كنا عايزين نستكرتكم و نسرقم ,و إن النظام الجديد (أبو 45 حني في الشهر ) إختياري مش إجباري,

    لو معملوش كده

    نعمل cancelation lel acount

    ونرفع عليهم قضية الإساءة لسمعة مصر (اشمعنا المدونين بس اللي تترفع عليهم القضايا دي)
    و كمان نشر البلبلة (جمع بلبل) بين المواطنين ونشر الشائعات كاذبة و, و تكدير السلم الإجتماعي (هو في تكدير و قلة مزاج أكثرمن كدة) ولا ايه؟؟؟؟
    D:

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s