خدمة الرد فائق السرعة على سيادته| انترنت بلا حدود

ثم أما بعد

الموضوع من إمبارح للنهاردة تطور بشكل غير مسبوق و جمع الآلاف من جميع الطبقات و الاتجاهات، كلنا واقفين من أجل حريتنا و حقنا. و بعد الانتشار المهول و الإيميلات اللي ما بتهداش الليلة دي حملتنا خدت تغطية إعلامية ساخنة على برنامج القاهرة اليوم لعمرو أديب

و الوزير كان هناك، و كان شكله وحش جدا

و التفاصيل كلها هنا

و رداً بقى على كلام الوزير الهايل ده… نحن نقدم خدمة الرد فائق السرعة احنا كمان

اشمعنى جنابه

كلنا هنتحرك في يوم الأحد 29 يوليو 2007 و هنعمل cancellation في كل الشركات اللي احنا حاجزين فيها و بتوقيت أول سبتمبر.

طلب الكانسيليشن احسن وأفيد لان مقاطعة الاستخدام لن تفرق معاهم والمقاطعة وعدم تجديد الاشتراك سيحملونكم مبلغ 30 جنية ايجار البوت فى السنترال لصالح المصرية للاتصالات اما كنسلة الاشتراك فسوف يكون خسارة على شركات النت وايضا المصرية للاتصالات التى تتربح من كل مشترك فى الدى اس ال بايجار البورت وممكن طلب الكانسل يكون دلوقتى مع اخبار الشركة بان يكون إلغاء الاشتراك وتفعيل الكانسل ابتداء من شهر سبتمبر مع بداية الأسعار الجديدة ودة احسن رد عليهم وياللى خايف من كنسلة الاشتراك ابقى ارجع فى كلامك يا عم فى اخر اغسطس بس المهم اكبر عدد”—أحد الناس المقهورة.

أهم الأخبار بقى إنه الحملة جمعت في ليلة واحدة أكتر من 1500 توقيع، و دي حاجة رائعة، كمان التصويت كان ضد القرار بنسبة 94% و دلوقتي بقى فيه مجموعات محلية في كل الأقاليم بتعمل على توعية الناس من النظام الجديد و مصايبه و ازاي ناخد حقنا.

الإيميلات تاني علشان الناس اللي لسة ما بعتتش… يا جماعة كلنا في المصيبة دي سوا… كله لازم يشارك و يعترض… كفاية بقى

جريدة الجمهورية eltahrir@eltahrir.net
أخبار اليوم akhbarelyom@akhbarelyom.org
جريدة الأهرام ahram@ahram.org.eg
مجلة لغة العصر ait@ahram.org.eg
بريد الجمعه: baridelgomaa@ahram.org.eg
برنامج العاشرة مساءً: al3ashera@dreams.tv
عمرو أديب alkaheraalyoum@orbit.net
أحمد رجب a_ragab@akhbarelyom.org
90
دقيقة 90min@elmehwar.tv

questions@cabinet.gov.eg رئاسة الوزراء

doustormail@yahoo.com محمد هشام عبية جريدة الدستور

dostor_eg@yahoo.com إدارة الدستور

Al3ashera@dreams.tv برنامج العاشرة مساءً

info@tra.gov.eg جهاز تنظيم الاتصالات

غير مواقع الشركات اللي في البوست اللي فات

ابعتوا و اللي بعت يبعت تاني و تالت… ما تبطلوش… و اتحركوا بقى مع بعض… قبل نهاية الأسبوع ده عاوزيم آلاف طلبات الإلغاء تكون على مكاتب العباقرة اللي فاكرين انهم هينهبونا كده و نسكتلهم

و لسة مش طظ

يحيا شباب مصر

حقك… ما تسيبوش

محجوب عبد الدايم


13 thoughts on “خدمة الرد فائق السرعة على سيادته| انترنت بلا حدود

  1. انا اول واحد معاك
    هنروح كلنا وياريت في مجموعات عشان محدش يكسل او يكش او يقنعوه بأنه مش لازم الوقتي
    كلنا نروح مع بعض
    عشان نوريهم اننا مش هنطاطي اكتر من كده
    كفاية النت الزبالة اللي بناخده

  2. انا معاكوا وهفصل دا استهبال مش عشان مش عاوزين يجددوا اجهزتهم وبدأ الناس تزيد يقوموا يشغلونا كلنا على نفس الاجهزة القديمة ويكسبوا على قفانا اكتر من الاول حراااااااام

  3. تفتكر كدة مش بدري حبتين؟؟؟
    أصلك عارف موظفين مصر. هتقولهم عايز أقفله أول سبتمبر هيدخل يكنسلك الحساب وانت واقف😀
    أنا كدة كدة هالغي إن شاء الله.. بس شايف إن الإخطار بإلغاء العقد في أول سبتمبر بدري شوية

  4. واضح ان الوزير جبلة رسمي ومش هايهزه شعراية حتى..
    هي خربت خربت..
    انا رايح 25 اغسطس الغي الاشتراك ومش عارف هاعمل ايه في حياتي بعد كدة.

  5. لأ مش بدري
    انت مش هتكنس فعلا
    انت بس هتخطرهم
    عشان يحسو انك فعلا جدي في الموضوع
    كمان عشان لما يلاقو ردة الفعل دي من بدري يحسو فعلا بالوضع اللي هيحصل
    كمان احنا مش عايزين نفصل
    احنا عايزينهم يرجعو عن القرار بتاعهم
    فاهميني يا جماعه
    احنا عايزين ردة الفعل بتاعتنا بدري عشان يرجعو عن قرارهم قبل 1 سبتمبر
    يعني القرار لا يطبق اصلا

    وربنا معانا جميعا

  6. ماينفعش القرار مايطبقش، عمر مالحكومة بتطلع قرار ومايتطبقش. افضل سيناريو دلوقتي انه يتطبق وبعديها يحسو هما عملو ويرجعو لصوابهم..

  7. يا دكتور انا معاكم ومش بدرى ولا حاجة
    بس انا ما عنديش وصلة اساسا لكن عايزة اعترض على الافترا والاستهبال اللى احنا عايشين فيهم بس تفتكر ممكن اعتراضنا يهزلهم شعرة صدقنى هى خربانة خربانة مش يأس بس الواقع بيقول كده
    مش بتراجع بس حد يقوللى يا جماعة اعترض معاكو ازاى ؟

  8. معاكم ان شاء الله
    وح نروح نلغي الاشتراك بتاعنا نعرفهم اننا من اول سبتمبر من ناويين نجدد الاشتراك تاني علشان الاسعار الجديدة
    علشان يبقوا عارفين اننا معترضين على القرار ده

    بس من شوية كمان قريت على مدونة حنتكلم خبر بيقول ان التطبيق للاسعار الجديدة بدأ فعلا

    مش عارفة مدى دقة الخبر ولكن الموضوع اهو

    http://7ntklm.blogspot.com/2007/07/blog-post_24.html

  9. أنا بصيت ع الموضوع وشايفه غريب شوية.. لأن دي مش تسعيرة جديدة.. النظام ده فعلا موجود في لينك اللي هو سرعته 512 و تحميل 7 جيجا والجيجا الزيادة ب8 جنيه
    ده أصلا فعلا موجود.. فما اعتقدش إن ليه علاقة بالموضوع بتاعنا المقرف ده
    أنا عموما المرة الجاية وأنا رايح هادفع هادخل خدمة العملاء وأسئله ولو طلع فعلا الكلام نهائي ومش هيطلعوا حل بديل بإنهم يرخصوا ال512 ويخلوه عرض كويس بحيث المتضرر من النظام الغبي ده يحول ل512 هاقوله يكنسل العقد أول شهر أغسطس ما يخلص.. وكدة يبقى عايزين خراب بيوتهم بقى

  10. يا هدى ممكن تساعدينا بإنك توقعي في الموقع بتاع جمع التوقيعات، و تبعتي إيميلات للناس المسئولة، و توعي زمايلك في الشغل و قرايبك بخطورة النظام الجديد و خطورة إجبارنا على استخدامه، و كمية الأموال اللي هتتنهب مننا بتطبيقه.

    بيلا– أنا شوفت الرابط، و ما اقدرش أتأكد من صحته، لكن الغالب إنه في إطار خطأ تقني و هما بيجربوا الواجهات الجديدة… و الاحتمال الطريف بقى إنهم بيلخبطونا علشان ما نبقاش عارفين إيه اللي هيحصل… زي الأخبار اللي أنا نشرتها دي… في إطار زعزعتنا عن موقفنا يعني

    بالظبط يا سيد حسّان. النظام ده موجود في الشركات دي من أكتر من سبع شهور دلوقتي، و راكد جدا و ماحدش بيستخدمه، و قرار الوزارة ده كان في إطار بعض المفاوضات مع الشركات دي علشان ينفذوا طلبات معينة. زي مانتا شايف قاعدين يتفقوا على جيوبنا. و كل اللي بنطالب بيه إننا ما نجبرش على خدمة مش عايزينها، و اللي هيجبرنا خللي له الخدمة يمكن تنفعه. و يبقى خربوا بيوتهم بإيديهم.

  11. بجد غباء شديد جدا…انا نفسي اعرف مين العبقري الجامد جدا ده صاحب الفكره…وطبعا كلنا عارفين مين العبقري التاني صاحب القرار…

    البلد اتملت عباقره يا جدعان…

  12. ده قرار معجزة بجد بحيي الوزارة عليه
    قدرت انها تقضى علي بعبع المدونين وفي نفس الوقت تنهب فلوسهم .
    نحن في بلد العباقرة علي رأي عمرو عمر
    ياريت كل الناس تشارك في الحملة لأننا مش لازم نسكت علي الوضع ده
    http://no-dsl.blogspot.com/

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s