لأ مش طظ| الحملة القومية إنترنت بلا حدود

بعد الخبر المرعب اللي قريناه كلنا من كام يوم عن تشويه خطوط الإنترنت المهترئة في مصر، الحكاية اتأكدت النهاردة لما سألنا في الشركات و عرفنا انه النية على كل الخطوط، و إنه المسألة مش شريحة معينة للراغبين، و إنما كل المشتركين سيجبروا على التعامل بالنظام الجديد.

 

و على ذلك يا جماعة، إحنا مش هنسكت. اللي هيسكت النهاردة عمره في حياته ما هيعرف يتكلم تاني بكرة. دي حملة منظمة كلنا هنشترك فيها علشان نوقف الكارثة دي.

 

أولا:

 

ثقف نفسك، و اقرا المصيبة السودا اللي هتحل على دماغ سعادتك.

 

و ده تحديث من واحد عاقل جداً omagian

 

 

 

———————————————————————-

 

الأسعار انخفضت والدليل قالولو !!!

 

 

 

نحسبها بالراحة وبكل ادب واحترام ,ومن غير ما نغلط في حد

 

 

انت بتستخدم النت في البيت انت وعيلتك المكونه من 5 افراد في المتوسط

 

وحسب وزير الأتصالات ان استخدام الفرد ساعتين

 

دلوقتي كلنا عارفي المواقع بتحمل في قد ايه

 

سيبك من الموضوع ده نحسب بقى موضوع ال 2 جيجا

 

الوقتي النت عندك في البيت هيشتغل لمدة 10 ساعات في اليوم

 

يعني ساعتين لكل فرد من 5 اللي في البيت ( يعني ابوك وامك ملهمش نفس يعني)

 

طبعا لما هتقعد ساعتين بس اكيد هتستغل الوقت دا على الأخر

 

يعني هتوصل لأقصى طاقة في bandwidth عندك ودا مش دونلود دا مجرد browsing و chat يادوب

 

الوقتي الخط 256 بينزل 12 كيلو تقريبا في الثانية

 

نحسب بقى

 

12 كيلو

 

60 ثانية

 

60 دقيقه

 

10 ساعات

 

30 يوم

 

المجموع كام ياشاطر

 

 

12960000 كيلو في الشهر

 

اقسم على الف يطلع بالميجا (مش هنقول 1024)

 

12960 ميجا

 

اقسم على الف يطلع بالجيجا (مش هنقول 1024)

 

12.96 جيجا

 

يعني تقريبا نقول 13 جيجا

 

طيب

 

الوقتي الخط بتاعك اخره 2 جيجا في الشهر

 

وبعد كده هتتحاسب الجيجا ب 10 جنيه والحسابة بتحسب

 

 

كده فيه 11 جيجا زيادة يعني 110 جنيه

 

يعني انت دفعت كام يا شطور

 

110+45= 155 جنيه

 

في الخط اللي المفروض ان تمنه الحالي 95 جنيه

 

وطبعا انت مستخدمتش الخط غير ساعتين في اليوم

 

يبقى مين بيضحك على مين

 

 

والخط رخص ولا غلي ؟!!

 

احكم بنفسك

 

 

يا مصري انتا كنت طول عمرك بتتسرق، و المسألة ماتغرتش كتير في حكاية الإنترنت. و الدليل الساطع أهوه. علشان بس الناس اللي لسة متشككة.

 

 

 

 

 

ثانياً:

 

ابعت لكل اللي عندك ع الميل، حذرهم و خليهم يشاركوا في الحملة بأي شكل، المصيبة طايلانا كلنا. الصغير قبل الكبير.

و ادخل هنا و صوت ضد الظلم و الإجحاف


 

 

ثالثا:

 

جمع اصحابك اللي عندهم نت، و لازم تتفقوا انه لو القرار ده ماتغيرش على الشهر اللي جاي كله يروح يفصل النت من الشركة اللي هوه حاجز منها. و لازم كلنا نروح في يوم واحد. خليه 25 أغسطس. لازم نوحد الحركة علشان تبقى ذات تأثير.

 

رابعاً:

 

وعي الناس الغلابة اللي حواليك، اللي مش هيفهموا الموضوع و هيروحوا بسذاجة و يشتركوا في الخدمة الجديدة اللي مالهاش لازمة، و بكده يرفعوا عدد المشتركين و نبقى ما عملناش حاجة.

 

خامساً:

 

اتصل بكل معارفك في أي جهاز إعلامي و فجر القضية على أكبر مستوى تقدر عليه. إحنا بنتكلم على شرفنا و حقنا في المعرفة هنا. آخر حاجة ممكن نتمسك بيها في البلد دي بعد ما كله اتباع.

 

سادساً:

 

ده خطاب مفتوح لرئيس الوزراء

 

 

 

” السيد المحترم رئيس الوزراء المصري

 

بعد التحية

 

مقدمه لسيادتكم مواطن مصري زيك بالضبط بالنيابة عن مواطنين مصريين زينا إحنا الاتنين

 

 

نود أن نعلم سيادتكم باستنكارنا الشديد و رفضنا القاطع للقرار الجائر الذي أصدره الوزير العامل لديكم طارق كامل وزير الاتصالات باستبدال خطوط الإنترنت العاملة بجمهورية مصر العربية منذ مبادرتكم عام 2004 و التي كانت تحمل لنا الشعور بالآدمية فوق العلم و الاستفادة، بأخرى سيئة الخدمة و محدودة الطاقة التنزيلية، و إجبار كافة أفراد الشعب من مريدي الخدمة على استخدام تلك المرافق المهرتئة، لتحقيق ربح رخيص و مكسب سريع لا ندري لصالح من.

 

و مما لا يخفى على سيادتكم أن انتشار الإنترنت مؤخراً في مصر قد أصبح الحسنة الوحيدة التي يلمسها المواطن المصري من مجهوداتكم المتعددة التي لا نشعر بها عادة. و عليه، فإننا كمواطنين شرفاء، نود أن نعلم سيادتكم أنه بتلك الخطوة التعسفية سوف تهدمون آخر ما بقى من أواصر التحمل المصري العتيد. لأن هذا هو كل ما بقى لنا من كرامة في هذا الوطن—حق المعرفة.

 

خطوط الإنترنت محدودة الطاقة التنزيلية أو ساعات التنزيل هي خدعة لا تنطلي علينا، و لما كنا نصبر على الخطوط المهترئة التي تقدمها لنا الحكومة و التي تبدو مضحكة بالمقارنة بدول أخرى مثل إسرائيل، أو أي من دول البحر المتوسط حيث انتشرت شبكات الـ T3 و ما بعدها، و لما كنا نعلم تمام العلم أن العالم أساسا بصدد تغيير البنية التحتية لشبكة الإنترنت بالكامل، بينما نحن ما زلنا نرزح تحت ما تدعونه خدمة الإنترنت الفائق السرعة، فإننا لن نصبر يوماً واحداً على تلك المبادرة الجديدة لاحتكار سوق الإنترنت، و التحايل على الدستور، و كبت حرياتنا. كنا لنصبر لو كانت المبادرة شريحة خاصة لأولائك الذين يريدونها، أما إجبار جميع المستخدمين على تلك الخدمة فهو أمر غير مقبول، و لن يحدث.

 

نحن نطالبكم بالتراجع عن هذا القرار الغير حكيم، و نثبت حقنا الإنساني و الدستوري و القانوني في استخدام خطوط الإنترنت التي دفعنا و سندفع مستحقاتها المالية كما تعاقدنا مع الشركات المقدمة للخدمة من أقواتنا و أقوات عيالنا كما نشاء، لنتعلم و نستمتع، و لنتواصل أيضا. و خدعة خفض السعر لن تنطلي علينا أيضاً، لأنه بالحسابات البسيطة، نجد أن 45 جنيه في مقابل 60 ساعة شهريا لا تتوازى أبدا مع 95 جنيه في مقابل 720 ساعة شهرياً.

 

و أخيراً فإننا ننذر حكومتكم الموقرة بأننا سوف نتوقف عن استخدام تلك الخطوط فور تطبيق ذلك القرار الفاسد، و نعدكم بخسائر غير مسبوقة في قطاع الاتصالات بالمقاطعة الشعبية المنظمة و بشتى السبل القانونية. نود أيضاً أن نلفت نظر سيادتكم أننا مواطنون شرفاء، و أننا متقيدون بالقانون الذي يحكمكم و يحكمنا.

 

 

و السلام

 

مواطن مصري زيك بالظبط.”

 

تقدر تشاركنا الضغط على الحكومة بإرساله موقعاً أو غير موقعاً على الإيميل ده questions@ cabinet.gov. eg

 

أو على بريد الحكومة اللي انا ماعرفوش

 

اللي يعرفه يقوللي

 

سابعاً

 

دي إيميلات هيئات و ناس ممكن تساعدنا… ابعت بغزارة و بانفعال… ما تخليش في صدرك حاجة و ما تقولهاش.

 

alkaheraalyoum@orbit.net عمرو أديب

 

90min@elmehwar.Tv برنامج 90 دقيقة

 

mostafabak@hotmail.com مصطفى بكري، جريدة الأسبوع

 

doustormail@yahoo.com محمد هشام عبية جريدة الدستور

 

dostor_eg@yahoo.com إدارة الدستور

 

7day@mbc.ae برنامج اليوم السابع

 

Al3ashera@dreams.tv برنامج العاشرة مساءً

 

ثامناً:

 

ابعث تحذير لشركة النت اللي بتتعامل معاها…

 

تي إي داتا

 

http://www.tedata.net/arabic/ContactUs.htm

 

لينك

 

http://www.linkdsl.com/LinkDSL_Code/Pages/ContactUs/Default.aspx

 

 

و اشتكي في جهاز تنظيم الاتصالات اللي طلعوا القرار العبقري

 

info@tra.gov.eg

 

 

و ده خطاب مفتوح للهيئة:

 

 

 

 

 

السلام عليكم

 

السادة المسئولين بجهاز تنظيم الاتصالات و على رأسكم السيد وزير الاتصالات

 

بعد التحية

 

نود أن نبلغ سيادتكم بتضررنا الشديد من قراركم الأخير بتشويه خدمة الإنترنت في مصر عن طريق تقليل ساعات الاتصال و الطاقة التنزيلية بما لا يتناسب على الإطلاق مع السعر المطلوب، كما نود أن نخطركم بغضبنا الشديد من كون هذه الخدمة إجبارية لكافة طالبي خدمة الإنترنت في مصر.

 

نخطر حضراتكم أننا نجد أنه من غير العدل ولا المساواة مع أمثالنا من دول العالم الحر أن نعامل بذلك الإجحاف و الكبت، و نحن إذ نصبر على خدمات الخطوط فائقة السرعة التي بليت في معظم دول العالم المتقدم و تم إحلالها و استبدالها بخدمات أخرى، فإننا لن نرض أن ينتقص من حقوقنا الأساسية المزيد من قبلكم.

 

و عليه فإننا نحذر سيادتكم أننا سوف نتوقف عن استهلاك تلك الخدمة بأعداد قد لا تخطر لكم ببال، مما سيتسبب بخسائر فادحة للقطاع، كما أننا سنعمل بكل طاقاتنا على توعية المواطن بمضار نظامكم الجديد، مما سيؤدي لنقص حاد في عدد المشتركين لديكم، كل ذلك و أكثر من السبل القانونية و المدنية سيحدث و بتنظيم شديد إن لم تتراجع هيئتكم الموقرة عن ذلك القرار المجحف، أو على الأقل تجعله اختياريا لمن يريد، على أن يستمر النظام الحالي لمن يريد أيضا و بنفس الكفاءة.

 

و السلام

 

 

 

و كمان اشتكي في القسم الإعلامي لوزارة الاتصالات هنا

http://www.mcit.gov.eg/ar/ContactUs.aspx

 

تاسعاً:

دي مواقع هتساعدك و بتتكلم في نفس الموضوع

http://netegypt.ch/

http://msh-ana.blogspot.com/2007/07/blog-post_22.html#comments

www.mesh-gayeb.com

أهم حاجة نتحرك كلنا في وقت واحد… المسألة عاوزة تنظيم و غزارة في الاعتراض

 

 

كل دي حاجات هتعملها و انتا قاعد على مكتبك، حاجات هتحافظ بيها على شرفك و كرامتك، و كفاية سلبية بقى، خدوا مننا كل حاجة، ما فاضلش إلا النت كمان؟

 

اللي مش هيبقى راجل النهاردة عمره ما هيبقى راجل تاني أبداً، و اللي مش هينتظم في الحملة دي عمره ما هيشوف حملة زيها للدفاع عن أي حاجة تاني في البلد دي. هما عاوزين يضربوا تواصلنا ده، عاوزين يعزلونا و يحاصرونا… ادولهم الفرصة المرة دي بس، و عمركم ما هتشوفوها تاني بعد كده

 

و مش طظ… أكيد مش طظ

 

محجوب عبد الدايم

 

القاهرة 2007

 

 


23 thoughts on “لأ مش طظ| الحملة القومية إنترنت بلا حدود

  1. أهديكم هذا الموقع

    http://www.hellkom.co.za/research/adsl2.htm

    وعنوانه المبرر لتكون حسودا ويحوي أسعار الخدمة وسرعتها في أنحاء العالم

    enjoy

    وأنوه إلى أن الكلام مش على الدونلود بس حيكون شامل كل حجم البيانات الذي ينتقل إليك خلال الشبكة شامل التصفح وكل شيء

  2. يا جماعه ضروري كلنا نروح يوم 25 اغسطس نلغي
    اللي عايز يشترك بعد كده هوه حر
    لكن لازم نحسسهم اننا مش مقاطف بودان يحطونا مطرح ماهما عايزين

  3. يا حاج محفوظ عفوا الحسبه اللي حضرتك حسابتها مش مضبوطه 150 جنيه ايه يا راجل النت زاد بنسبة 1000% واليك الحسبه دول عالم جبابره

    اولا: (النظام القائم)

    عدد الساعات المتاحه في الشهر = 24 ساعه * 30 يوم = 720 ساعه

    قيمة الأشتراك الشهري = 95

    سعر الساعه = 95 جنيه / 720 ساعه = 13 قرش للساعه

    ده بالأضافه لداونلود مفتوح وكل واحد و شطارة جهازه هو ورزقه من النت يعني

    ثانيا:( نظام الباراشوت)

    عدد الساعات المتاحه شهريا= 720 ساعه

    عدد الساعات المنعم علينا بيها = 60 ساعه * 75 قرش للساعه = 45 جنيه وهي قيمة الأشتراك الجديد ( المخفض)

    عدد الساعات المتبقيه من الساعات المتاحه في النظام القائم=720 ساعه – 60 ساعه = 660 ساعه

    قيمة الساعات المتبقيه خارج ساعات الأشتراك الجديد بفرض أستخدامها

    = 660 ساعه * 1.5 جنيه سعر الساعه خارج الأشتراك= 990 جنيه

    ادا قيمة الأشتراك بفرض استخدام الساعات القصوي المتاحه

    (النظام القائم = 95 جنيه مصري)

    (النظام المخفض المقترح = 45 اشتراك +990 قيمة ساعات زائده=1035 جنيه مصري)

    بيتهيالي بعد هده المقارنه اللي يقول تخفيض قيمة اشتراك النت يبقي انسان احمق (عفوا سيادة الوزير)

  4. يا حاج محفوظ عفوا الحسبه اللي حضرتك حسابتها مش مضبوطه 150 جنيه ايه يا راجل النت زاد بنسبة 1000% واليك الحسبه دول عالم جبابره .

    اولا: (النظام القائم)

    عدد الساعات المتاحه في الشهر = 24 ساعه * 30 يوم = 720 ساعه

    قيمة الأشتراك الشهري = 95

    سعر الساعه = 95 جنيه / 720 ساعه = 13 قرش للساعه

    ده بالأضافه لداونلود مفتوح وكل واحد و شطارة جهازه هو ورزقه من النت يعني

    ثانيا:( نظام الباراشوت)

    عدد الساعات المتاحه شهريا= 720 ساعه

    عدد الساعات المنعم علينا بيها = 60 ساعه * 75 قرش للساعه = 45 جنيه وهي قيمة الأشتراك الجديد ( المخفض)

    عدد الساعات المتبقيه من الساعات المتاحه في النظام القائم=720 ساعه – 60 ساعه = 660 ساعه

    قيمة الساعات المتبقيه خارج ساعات الأشتراك الجديد بفرض أستخدامها

    = 660 ساعه * 1.5 جنيه سعر الساعه خارج الأشتراك= 990 جنيه

    ادا قيمة الأشتراك بفرض استخدام الساعات القصوي المتاحه

    (النظام القائم = 95 جنيه مصري)

    (النظام المخفض المقترح = 45 اشتراك +990 قيمة ساعات زائده=1035 جنيه مصري)

    بيتهيالي بعد هده المقارنه اللي يقول تخفيض قيمة اشتراك النت يبقي انسان احمق (عفوا سيادة الوزير)

  5. زي ما أوميجا قال بالظبط… لازم نبقى قد الكلمة، و لو ما رجعوش عن البجاحة دي أنا هافصل و أقسم بالله… ما فيش حاجة تعز ع الواحد بعد كده أساسا

    الله حسبتك هايلة يا وليد انتا كمان، و على فكرة أنا كنت قاعد باعمل نفس الحسبة الوقتي مع جماعة اصحابي و الحمد لله اننا على نفس موجة التفكير

    اوعوا تتوقفوا يا رجالة… الموضوع جاري تحديثه على مدار الساعة

  6. ياعم وليد انا اللي عامل الحسبة دي على اساس انك هتقعد ساعتين بس زي قرار الوزارة ( وزاكرو من نت الوزارة يا اولاد )
    دا الكلام اللي انا عامل عليه الحسبة
    يعني انا متكلمتش في موضوع الدونلود انا خليتها شات و براوزنج على سرعة 12 كيلو في الثانية مش 32 كيلو في الثانية زي مال خط 128 بيجيب
    اقراها تاني وانت تفهم قصدي
    لو اتكلمنا في موضوع دونلود وعدد ساعات مش هنخلص لكن
    الوزارة بتقول انت هتستخدم النت ساعتين بس
    وعلى حسبة ان كل واحد هيمشي على المقرر وياخد الساعتين اللي فيهم النصيب بس
    كده هتدفع 155 جنيه في الخط ابو 95 جنيه الوقتي اللي بتخش عليه براحتك ولا حد يقولك ساعتين وتقوم ويمسكلك العداد

  7. الشئ المثير فعلاً إنك مهما حسبتها، يمين شمال كده كده المسألة فيها سرقة و نصب و كبت و كل اللي انتا عاوزه، فمش معقول بقى يعني نكون كلنا فاهمين غلط و هما اللي فاهمين مصلحتنا، النظام الأبوي ده مش هينفع معانا خلاص

    اتفطمنا من بدري

  8. في أخ باسم محمود العربي عمل الموقع ده للحملة
    http://netegypt.ch/
    الصراحة أنا شفت شوية كاركيتيرات ع الموضوع مسخرة..
    بس ما اعتقدش إن في عقل يقول اللي هما بيقولوه ده
    النت في مصر بقى عامل زي الكورة.. وهما عارفين لو البلد ما دعمتش الكورة إيه اللي هيحصل لأن الناس هتطق ومش هتلاقي حاجة تلهيها فهتفوقلهم بقى

  9. الحكومة مش عايزة الناس تتعلم نت وهي عاوزة تمص دم الشعب باي طريقة كانت واحسن حاجة ان الواحد يبطل نت للابد وينسي حاجة اسمها تقدم وحضارة لان الوزارة طلعت تجارة

  10. لا بقى مش هنبطل نت… و هناخد حقنا… و ماحدش هيلوي دراعنا على خدمة ماحناش عايزينها.

    يا جماعة اتحركوا… قولوا لأ المرة دي بقى. اظهروا رفضكم… و الله مصمصة الشفايف ما هتنفعكم المرة دي.

  11. يا جماعه
    انا كلل ما اكلم واحد يقولي مش هتقدروا تعلمو حاجه. يعني اخركوا ايه !!

    انا عندي مثال بسيط
    فاكرين دقيقة الموبايل كانت بكام وبقت بكام !!
    فاكرين لما موبينيل وكليك عملو موضوع شهرين سماح بس والناس كلها قلبت عليهم
    بعد اقل من شهر الشركتين رجعو في كلامهم ونزلو اسعار المالكمات اكتر من الأول.
    ليه ؟
    لأننا وقفنا مع بعض ضد نظام الأحتكار
    وقفنا مره واحده وعملنا نتيجة كبيره
    المرادي كمان لازم نقف _ على رأي عوكل وقفة رجالة ( اللي هيه كده يعني )
    لأننال او مكاكناش المرادي
    مش هنلاقي مكان نتكلم فيه بعد كده
    مش هنلاقي منتديات نتكلم عليها
    ومش هنشوف النت اساسا هيبقى اخرك 24 دقيقه في اليوم زي ما سيادة الوزير بيقول

  12. كل مااكلم حد يقولي مش ح اقدر استغني عن النت

    فيه ايه ياجماعة
    معقول وصلنا للمرحلة دي وح نسيبهم يمسحوا بكرامتنا الارض وندفع السرقة عيني عينك واحنا ضاغرين

    مش عارفة احنا لامتى ح نفضل مش حاسين بمصلحتنا ولا بنطالب بحقوقنا

    وايه يعني لما نستغني عن النت شهر واحد
    والله لو قطعنا ومادفعناش اشتراكات لمدة شهر واحد الشركات ح تبوس ايدينا ورجلينا علشان نوافق نرجع بشروطنا

    موضوع عدم القدرة على المقاطعة ده فكرني بمشروع البتلو اللى كان عامله المرحوم انور السادات ومنع دبح الاناث لمدة شهر فاظا على مشروع اللحوم ومنعها من الارتفاع وحمايتنا من استغلال التجار

    الناس وقتها كانوا بيشتروا اللحمة سرقة زي المخدرات وكأن لو مااكلوش لحمة روحهم ح تطلع ومات مشروع البتلو بسبب طفاسة الناس وعدم قدرتهم في التحكم في نفسهم

    ياترى ح نعمل زيهم احنا كمان ونسيبهم يدبسونا في النظام الجديد

    ولو ماقاطعناش مين ح يقدر اصلا يدفع المبالغ الخرافية دي كلها؟؟

    مش كفاية الفواتير المصايب التانية اللى بندفعها

    فعلا لو ماعملناش حاجة المرة دي يبقى الشعب ده خسارة فيه الحياة اصلا وقليل عليه العطش والجوع

    واللى قال الشعوب تستحق حكامها اكيد كان بيقصد خنوع المصريين ورضاهم بالذل بحجة الصبر وهم شعب كسول بيخاف يطالب بحقه

    الرحمة ياعالم ح نفضل لامتى صاغرين كده

  13. يا جماعة احنا صوتنا بقى مسموع قوي… و الناس مش هاتيجي من أول مرة… خليكوا وراهم طول الشهر ده.. و كويس ان قدامنا وقت كويس نوعيهم و نحذرهم… ماحدش يزهق…. و الله العظيم شكلكم يفرح

    عاش شباب مصر

    احنا ولاد الكلب الشعب… و هناخد حقنا من عين التخين

  14. سلامات يا حكومة يا مظبطنا.انا مش عارف الناس دى بتفكر ازاى هما مع النت و لا ضدة امبارح كانوا معانا النهاردة يلغوا النت شعبك يقول عليك اية؟؟ و بعدين بردة النت فى مدونات و كليبات تعذيب و اشتغالات على المعلم الكبير و احنا مش ناقصين فالى حصل يا جماعة تبع لما جاء فى الجزيرة ان الشيطان طلع و قال ناخد من كل خط شوية لغاية ما الباند بقت 2 جيجا انا عن نفسى بعمل شغلى فى واحد فيمتو ثانية لا غير عباس قدرةو ان شاء اللة السنة الجاية يقولك اتنفس شوية هوا قد كدة و بعدين الزيادة ادفع يا خفيف سلامتها ام حسن و على راى المثل صدرها للى يقدرها و هى دى هى فرحة الدنيا بصراحة اللى ما يلغيش اشتراكة مع احترامى ما عندوش دم و يستاهل اللى يحصل مش فى النت بس و اللة سلام

  15. الحل عندي لكل من لا يريد ان لا يصبح مصبح مصري و عيش في قرف و حياتة كلها قرف x قرف :-

    انة يهاجر و يخلص و ميرجعش نهااااااااااااااااائيا .

    و يسيب البلد تولع بالفيها .

    ( نقطة )

  16. مش حل يا ابو نقطة

    أولاً البلد المقرفة دي هيه اللي انتا اتربيت على حساب أهلها الغلابة لحد ما عرفت تقعد على كومبيوتر و تعمل فيها ابو العريف و تشتمها

    و ثانيا، مهما هاجرت ولا اتنيلت على عينك، هتفضل في عيون كل الناس مصري، لازقة على وشك، هتقعد تبرر نفسك ألف مرة في اليوم لكل واحد يشوفك و يقعد يتساءل عن أصلك و حكايتك

    مش حل يا ابو نقطة

    المشكلة اتحلت بسبب الناس المصريين ع الورق و براه.. يا بتاع الورق… يا متطبق

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s