تريــــان|حدوتة رومانية

كان ياما كان، كان فيه زمان دولة صغيرة و محندقة في شرق أوروبا إسمها (رومانيا). و كان الرومانيون يعيشون في سعادة و هناء في ظل الطبيعة الساحرة و البنايات الخلابة المبهرة الملهمة، و ظلال مصاصي الدماء ليلاً، و جلادي الحزب الشيوعي التابع للاتحاد السوفيتي نهاراً.

و في يوم من الأيام، حدث ما لم يكن في الحسبان

أو كان في الحسبان، هتقرق يعني؟

إنقلاب

– همم، و بعدين؟

– بقوا دولة ديموقراطية !

– يا سلام؟؟ بالبساطة دي؟

– آه، شوفت بقى؟

سنة 2004، و بالتحديد بعد 15 سنة من الانقلاب، جه راجل اسمه (تريان باسيسكو) و نجح في الانتخابات الرئاسية، و بقى رئيس رومانيا. و بعد فترة صغيرة من توليه الرئاسة، نجح في السيطرة على كتير قوي من بؤر الفساد في البلد، و قدر ينهض بالبلد لدرجة تحقيق الشروط المرهقة بتاعت الالتحاق بالاتحاد الأوروبي.

و انضمت (رومانيا) للاتحاد الأوروبي بعدها.

لكن عمو (تريان) كان لسة عنده كلام تاني. ما كانش فاكر نفسه حقق معجزة، مع ان الانضمام للاتحاد البركة ده معجزة المعجزات اليومين دول، و اسألوا عمو (أردوجان) و عمو (سيزر) بتوع ماما (تركيا). الراجل ما كانش حاسس انه الملهم الوحيد في بلدهم، ولا إنه خلاص، المفروض كل الناس تركعله و تسجدله لأنه “عبر بيهم لبر الأمان، من النصر إلى الهزيمة، و من التخلف للعصرية. ولا قيادة، ولا عبور للمستــ..هبل”. واخدلي بالك انتا و هوه و هيه؟

صحصحوا معايا، ما تناموش!!

من كام شهر كده، (تريان باسيسكو) قال كلام كبير كده عن “تحديث الطبقة السياسية” و ” اللائحة الفردية” و …

“تعديل الدستور” !!!

كلام ما عجبش حد من النخبة، بكوات البرلمان الروماني. كلام يقلق…يخوف. مشاركة؟ تعديل دستور؟ شفافية؟ تأثير حقيقي في الحكم؟ لا لا لا، ده كلام… موش تمام.

و بعدين، قالوا بس، احنا نشيل الراجل ده، و “كله بالقانون” على رأي (السادات) الله يرحمه بقى.

قاموا عملوا جلسة في مجلس الشعب بتاعهم، و عملوا استفتاء برلماني (ما قالوش فيه النشيد الوطني، ولا قزقزوا فيه لب، ولا لبسوا فيه “بتاعة” مكتوب عليها أبصر مادرك إيه) و صوتوا على “تعليق مهام الرئيس” .. رفته يعني.

آه …ما تتخضوش قوي كده. في أوروبا و الدول المتقدمة، بيصوتوا على رفت الرئيس. الرئيييييس، خدوا بالكوا كويس يعني.

المهم، التصويت كان بأغلبية ساحقة ضد الراجل، و فيه بتاع 300 واحد من ال500 بتوع البرلمان قالوا الراجل ده يمشي. سبحان الله، ولا همهم يعني.

و جه بقى وقت الجد

استفتاء شعبي.

و عمو (تريان) هوه راخر ما هموش، نزل الاستفتاء بقلب جامد، و راهن على الشعب، و كان متأكد إنه هينجح، علشان الشعب هوه اللي جابه، و الشعب بس هوه اللي ممكن يشيله، من غير أمن دولة، من غير دعم خارجي، و من غير موظفين الحزن الوثني الدكتوقراطي بتوع “التصويت الشعبي”.

و الشعب الروماني قال كلمته…

لأ بجد قال كلمته، ماحدش كتبهاله و حطها في الصناديق حرصا على راحته يعني.

خمسة و سبعون بالمئة من الجمهور صوتوا لصالح (تريان)، و … (تريان) علق كده بعد النتيجة…

حان الوقت ليكون هناك دستور للرومانيين، و ليس للسياسيين. سأعقد اجتماعاً قريباُ مع الأحزاب النيابية لبحث سبل تحديث الطبقة السياسية

.

إيه؟ يعني ما قدمش معاد الاستفتاء، و مزورش، و ما رماش النتيجة المزورة على شعبة زي البصقة و جري بره البلد بحجة قمة، و كمـــــــــــــــــــــــــــــــــــــان عاوز يقعد مع الأحزاب بتاعته- اللي هيه أساساً كانت بتصوت على اقالته- علشان يتناقش معاهم و يشوف إيه رأيهم في تحديث الطبقة السياسية و تعديل الدستور؟!؟!؟!؟؟!؟!؟

لأ لسة

تعليقات المعارضة على نتائج الاستفتاء الشعبي…

انتصار باهت”-ميريسا جوانا رئيسة الحزب الاجتماعي الديموقراطي التي قادت الحملة ضد تريان

.

” اعتبر الرومانيون قد أعطوا فرصة جديدة لسيسكو”-كالين تاريسيانو رئيس الوزراء الأسبق و الحليف السابق لتريان، و خصمه اللدود الآن.

إيه دول كمان؟ ماحدش فيهم اعترض على نتيجة التصويت؟ ولا حد طعن بالتزوير؟ ولا أي حاجة خالص؟

و أمن الدولة ما لمهومش؟ ما اترموش في الصحراء لمدة 24 ساعة علشان يتمنعوا من التصويت؟ ولا اتحطوا في سجن لحد ما السكري و خشونة المفاصل كلتهم؟

و عاشت دولة (رومانيا) في سعادة و هناء تحت ظل الطبيعة الساحرة، و البنايات الخلابة المبهرة الملهمة، و.. و بس

ما بتفكركوش بحاجة الحدوتة دي؟

بجد؟

ولا أنا

طظ

محجوب عبد الدايم

القاهرة 1930.


15 thoughts on “تريــــان|حدوتة رومانية

  1. استنى كده ، انا بشبه على اللي حصل ده
    باين شفته قبل كده
    انا متاكد

    اسف لا ده كانت أخبار الاولى المصرية كان جايبين فيها فيلم خيال علمي

    مش مشكلة بقى احنا برضه احسن منهم

  2. أحمد و ناريات

    طبعا.. نحن أكثر تقدماً و أعز نفرا. و نشرب إن وردنا الماء صفواً و يشرب غيرنا كدراً و طينا. و بعدين أساسا احنا ديلنا طاهر، يعني منزلين من السماء، و مرتبطين بالذات الإلهية، و تقدر تقول علينا كده شعب الله المختار نمرة اتنين. انما هما بقى.. شوية حشرات.. زناة عراة… عزيمتهم رخوة.. و متمسكين بالحياة الدنيا.. و حضارتهم اللي انتوا شايفينها دي خرعة، و مسوسة، و متهتكة، و ان شاء الله ان شاء الله يعني في يوم من الأيام هتتهد لوحدها من جواها.. من غير ماحنا نعمل أي حاجة… و بعدين سنرجع لعزنا و مجدنا و سؤددنا

    جتها نيلة اللي عايزة خلف… نيلة تقيلة

  3. حضارتهم قدامها شوية لو مستعجل ممكن تاخد تاكسى…احنا عاملين زى قبيلة عميان و فيها شوية مفتحين …احنا بقى العور( بعين واحدة يعنى) فى انتظار لما المفتحين يموتوا عشان نستولى على العالم ( على رأى أفلام الكارتون) و نبقى سادة العالم بعد كده…احنا عملنا زى اليهود بالضبط لما قالوا لسيدنا موسى ” اذهب أنت و ربك فقاتلا انا هاهنا قاعدون” …امال ايه يا برنس…ده احنا جامدين قوى…و زى ما محجوب قال …جتها نيلة اللي عايزة خلف… نيلة تقيلة

  4. ناريات– الله يبارك فيكي و عليكي و حواليكي…طب مش تقوللي اننا جيران.. دي هتبقى جيرة الهنا ان شاء الله..

    وورد برس أكتر من هايل بصراحة.. الدنيا هنا راقية و نضيفة كده.. حاجة ممتعة

    أحمد و جازي– أيوة ياحمد، لو مستعجل تاخد تاكسي زي ما جازي قاللك.. الموضوع هيطول .. هيطول قوي..

    انا بصراحة لسة مش فاهم الفكرة بتاعت اننا نستنى لما كل الحضارات تنهار و العالم يتحطم و بعدين بالطريقة دي الإسلام و العروبة هيرجعوا لرونقهم و سيادتهم.. ايه يعني؟ هنبقى ملوك أرض الجماجم مثلا؟

    بس الحكاية ممكن تتفهم قوي في سياق “اذهب انت و ربك فقاتلا إنا هاهنا قاعدون” كويس قوي

    معركة التنمية و النهضة دي مش شغلنا.. مالناش فيها.. احنا ممكن قوي نفجر نفسنا في بعض.. كده أسهل

  5. Mahjoob, alf mabrouk the new blog…i like the look although the writing is as great as the old one!
    I have to congratulate you on what you did or said at the bus!!! you are a hero for pretty girls riding public transportaion.will come back later to read more!!

  6. ياعالم بلاش مبالغات وكلام من اللى يسهر العقول معقول ممكن الشعب الرومانى يعرف مصلحته ويقرر ماينفعه بلا وصاية الأباء الجهابذة يعنى مفيش حد يقولهم كدة دح ويخدرهم بثقافة البح والأح والواوا
    أكيد يامحجوب ياخويا تعشيت تقيل ونمت عشان كدة الكوابيس دى ملازماك
    ثم ياسادة مالنا كدة إحنا 100فل و12
    الأوصياء كفونا مهمة الترشيح والتصويت والتشريع وأهو زيتنا فى دقيقنا وياسلام بس لومنبصش لدول الإباحيية والعربدة عشان متجيناش لعنة من البحور السبعة ولا نصحى نلاقى نفسنا إتحولنا أدميين

  7. يا سيدي… دي حواديت عيال زي الشاطر حسن و امنا الغولة كده. ما تاخدش في بالك. هذا خيال لا يحدث إلا في كتب الأطفال اللي أنا كنت بقرألكم منها. دي يا ولاد حدوتة قبل النوم… حدوتة رومانية.

    الحمد لله… احنا ما عدناش بنبص للدول الإباحية دي. بقينا بنتطلع بانبهار لزيمبابوي و الصومال، و بنتمثل ديموقراطية موريتانيا. و حلمنا الكبير اننا بعون الله نغلب بنين في التصفيات المرة دي.

    هيهي نورتني يا أستاذ طال الليل. فرجه قريب

أضف تعليقاً

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s