ألف مبروك لمصر… الإيه دي إس إل تو نزل في تي إي داتا…
شوفتوا التطور بتاع مجال الاتصالات اللي علاء كان بيقولنا اننا لازم نمتدحه؟؟ آدي التطور ولا بلاش…
المهم، تي إي داتا مشكورة نزلت الخطوط الجديدة، و بكده الخطوط القديمة أسعارها نزلت طبعا، باستثناء خط ال256 الغلبان، اقتصاديات سوق بقى. فاكرين لما كانوا بيقولولنا على آليات السوق الحرة و البيزنيس موديلز؟ هيهيهي
أنا باكتب ليه بقى؟ طالما هيه كبسة تقيلة في وشي و وش اللي جابوني و هما طلعوا ناس زي الفل أهوه؟؟
باكتب علشان سياسة الاستخدام العادل.
دي بقى مسمار جحا الجديد لانج في مسألة الـ ADSL 2PLUS الجميلة اللي حاصلة دلوقتي
باين من أسرار تي إي داتا الحربية… حاطين الكلام ده في ملفات بي دي إف مكتوبة بالانجليزي و مش مترجمة على الموقع بتاعهم… و ماله… ما يضرش.. تعالوا نشوف فيها إيه سياسة الاستخدام العادل دي
بيقوللك يا سيدي – و خد بالك من الاسطوانة المشروخة بتاعت المرة اللي فاتت- قال إيه؟ تشارك خط الإيه دي إس إل العادي ده بيضر بالمشتركين، لسبب عجيب قوي… سبحان الله! بيقولوا انه الترافيك اللي رايح جاي ع الخط ده كده موش تمام، حاجة عيب يعني… بيزحم الدنيا باين. فبيقولوا ايه بقى:
كيف تعمل سياسة الاستخدام العادل؟
يتم حساب كم الحركة الإليكترونية (الترافيك يعني) لكل من خطوط الـ ADSL و الـADSL 2PLUS شهريا. و عندما تتخطى تلك الحركة حداً معيناً يعطي انطباعاً أن هذا الخط يتم تشاركه بشكل غير قانوني، أو “إساءة استخدامه بشكل شخصي بشكل يؤثر على باقي المستخدمين” ، فإن السرعة تهبط تلقائيا إلى 64 كيلو بايت في الثانية لما تبقى من الشهر. على أن تعود السرعة إلى السرعة المتعاقد عليها في بداية شهر جديد.
و ما هو حجم التداول المسموح به من قبل سياسة الاستخدام العادل؟
يختلف حجم التداول من سرعة إلى أخرى. و يتراوح بين 100 إلى 150 جيجا شهريا.
همم؟
و من غير حكومة أهوه يا عم، ولا وزير اتصالات بقى ولا هلمة ع الفاضي… و أعلى ما في خيلك اركبه، و الكلام على كله… القديم و الجديد، و عادي جدا. و لو كلمت الدعم الفني، ولا كلمة عن الحكاية دي خالص… هيقعد يقوللك رستر الرواتر، و مش عارف اعمل ايه… و خلاص.
نت محدود الطاقة، إجباري، على كله، غصب عن عين التخين…. هيه؟
مبسوطين بقى؟ ربنا يخلي لنا قطاع الاتصالات.
أنا عاوز واحد يطلعلي زي المصري الوطني المجاهد يقوللي تاني بوس إيدك وش و ضهر، و انتا ما بترضاش باللي ربنا (شركة تي إي داتا يعني) قسمهولك، و بتهين سمعة مصر… هابوس راسه و اقوله حقك عليا، ما اهو اصل انا دايما اللي باطلع وحش في الآخر… و ديماجوجي و شوية حاجات كده فوق بعض.
طظ
محجوب عبد الدايم
أوشيانيا … 1984…
تحديث ع السريع…
الـADSL 2PLUS نزل نظرياً بس، لأنه مكتوب في الملف إنه جودة الخط هاتعتمد بشكل رئيسي على جودة خط التليفون اللي موصله، و على بعد هذا التليفون عن السنترال الرئيسي. ولا عزاء للأقاليم، و العشوائيات، و شوية الحاجات اللي جنب بعض دي.
أبريل 1, 2008 at 4:09 م
صباح الخير شئ متوقع من شركة حقيرة و حكومة احقر تعمل من اجل مصلحة ناس معينة و لا عزاء للى بيموتوا فى طوابير العيش و اللى جالهم شلل نصفى و يقولك منزلين خط ب 2250 يا بلاش فى الشهر طبعا مع ناى مرتبى مثلا 162 و قرشين فى الشهر بردةو طبعا هيطلع عليا واحد من المجاهدين يقول انى با قول كذب و افتراء على الحكومة و نا دة مش صحيح و ان 162 دول فى الساعة و ناس تانية هتقول هو دة الحقد الطبقى و يبتسم فى خبث و دهاء و بلاهة على العموم دة المتوقع لان احنا الحمد لله لا لينا مطال و لا نقدر نطالب الشركة بحجاة و اللى عاوزينة هيعملوة و ابقى سلملى على الاعتصام يوم 6 ابريل و تحيا جمهورية مصر العربية حاليا (الممكلة المصرية قادما)
أبريل 1, 2008 at 4:16 م
d a whole 1.5 GB movie in less than 9 minutes(from tedata manual) مش الافلام كانت حرام من كام شهر ايام ما الغضنفر طلع الاسد الجسور حامى حمى النت و قال ان النت مش معمول للافلام ايام موضوع التحديد دلوقتى بيعمل دعاية ان الخط بينزل فيلم فى 9 دقايق على العموم الافلام حرام حرام حرام الا لو كانت الفرجة من anatomical point of view و بالقياس على باقى الافلام صباح الخير اما الاغانى و الالعاب و بالنسبة للبلوجات و اليوتوتيوب من حقك تكتب و من حقى اوريك العصاية و الحمد لله على اليمواقراطية و باشكر السيد رئيس الجمهورية راعى النت فى مصر و باهدية اغنية الموت علينا حق
أبريل 5, 2008 at 6:16 م
ما كانشي العشم
لا انا زعلانة
يعني بتكتب من تاني و ما قلتش؟
المهم الحمد الله على السلامة وحشتنا اوي ووحشنا محجوب و طظياته
الااي ادس اس ال بالاردن بقالي بستعمله خمس سنين
معقولة وصل مصر اليومين دول؟
مبروك يا عم و ان شاء الله بقي نشوفك اكتر
و نورت البلوجوسفير كله