انا الحقير بكل داء مبتلى انا الكريه كليم جن العبقر
صعلوك قوم في سفاهة سيد بلسان افعى عشيق رد المنكر
كل السواد و الانحطاط انا جامعه كل السفالة و الوضاعة بمئزري
سفر القذارة يرقب ..
كفايه كده
محجوب عبد الدايم لمن لا يعرفه، شخصيه مثيره للجدل ظهرت لاول مره في رائعة (نجيب محفوظ) القاهرة 30 . محجوب كان فقيرا كما يجب ان يكون الفقر، مقهورا كما يجب ان يكون القهر، و شريرا كما يجب ان يكون الشر ايضا. محجوب يمثل كل ضعفنا، كل نقائصنا التي لا نعترف بها، كل اللامبالاه و كل الخسه التي نتمتع بها ولا نجرؤ على البوح بفحواها. تمنيت كثيراً ان اتحلى بالمزيد من مثالبه الخلابه، و لكني دائما ما فشلت. ببساطه و اختصار، قررت اعادة بعث هذا الخليط السحري من جديد.
يوليو 24, 2007 at 3:56 م
عم مساء يااستاذ محجوب
اختيار موفق لشخصية على مافيها من عيوب كثيرة الا انني اعتبرها ضحية صارخة لمجتمع ظالم.
لو كان محجوب عبد الدايم وجد حياة افضل ربما صار افضل.
ولكن من يدري ربما هذا من حسن حظنا لنتعرف على كل محجوب عبد الدايم من المحجوبين المحيطين بنا
تحياتي لاختيارك العبقري
كنت اريد ان اعرف كاتب الابيات المذكورة عاليه اذا سمحت
يوليو 24, 2007 at 11:58 م
يا دي النور
شاكرين مهللين.. كلنا عندنا جزء محجوبي خفي.. كلنا بنحاول نخبيه… مش عارف ليه مش بنحاول نتعايش معاه و نستكشفه.
الأبيات دي من تجليات امتحانات الباطنة… العبد لله هوه اللي كاتبهم في حالة مدقعة من الدونية و التلاحم مع النفس. هيهيهيهي
يوليو 25, 2007 at 4:10 م
بسم الله ماشاء الله عليك
متعدد المواهب الأدبية
ربنا يزيدك من علمه
بالفعل كل شخص فينا داخله جزء محجوبي يحاول أن يخفيه وكل محجوب وشطارته بقى
فيه اللى بيعرف يخفي كويس وفيه اللى بيخفي على طريقة الكنس تحت السجادة وهو متصور ان الدنيا ضيفة وكله تمام ومش واخد باله ان اي حد يدوس بيحس بالمحجوبية بتنط في وشه
هههههههههههههه
مدونتك التجول فيها شديد الامتاع صراحة
لاحرمنا الله من قلمك وخفف عنك سوءات الامتحانات وربنا ينجحك وتبقى طبيب قد الدنيا وتخفف عن المرضى الغلابة ىلام فواتير المستشفيات
مش كفاية علينا النت
ههههههههههههه
يوليو 26, 2007 at 5:12 ص
هيهيهي أخجلتم تواضعنا و الله
آمين ياختي آمين… يسمع من بقك ربنا
و شرفتيني في المدونة المتواضعة دي… ربنا يقدرنا و نبقى على مستوى التوقعات
مارس 30, 2008 at 11:51 ص
السلام عليكم ورحمه الله أخى محجوب والله انا أول مره أدخل الموقع بتاعك وأقعد أستكشف فيه وبصراحه ربنا يزيدك كمان وكمان المشكله فى البلد دي أنا على الرغم من أن فيها ظلم كتيير الا ان دا كله مش محسوس ودا بسبب قتله ومغتالى الفكر وبسبب تقصرينا برضه فربنا يعينك وتعيد الينا الاحساس بكل ما يحدث على أرض الواقع
Abdurrahman
يناير 3, 2009 at 1:55 ص
السلام عليكم يادكتور محجوب
المفروض ان حضرتك معانا في اسره سوا
بس جايلنا اخبار انك قررت تعتزلنا
ممكن ماتمشيش !؟
بيتهيألى انى علقتلك علي كتاباتك كتير
بس انا مستغربه جدا انت ليه
مابتنشرهاش في مجله او جرنال كبير لأنها فعلا
تستحق?!
بس وربنا يوفقك
يناير 5, 2009 at 5:53 م
و عليكمُ السلام و رحمة الله و بركاته
عبد الرحمن– بأيديكم و أيدينا إن شاء الله… أهم حاجة الاستمرار و التجويد.
دكتورة همسة– طبعاً فاكرك هيهيهي… شوفي يا ستي
سوا من أجمل التجارب اللي عيشتها في حياتي، و ليها معزة خاصة قوي في قلبي. و بجد من أجمل الفترات اللي قضيتها لما كنت باشتغل معاكم و باسمع تعليقاتكم… فمش معقول بعد الحب ده كله اعتزلكم… لكن المسألة فيها نظر
كل اللي هايحصل إني مش هاكتب في المجلة. ده مش معناه اني اختفيت أو باقطع علاقتي بيكم… ده انا ما صدقت الاقي ناس دماغها راقية بالشكل ده. لكن الأسباب اللي عشانها مش هاكتب في المجلة خارجة عن إرادتي خالص
أول حاجة أنا بقيت راجل عجوز خالص خالص… يعني خلاص، الامتياز بيودع و كلها كام أسبوع و علاقتي بالجامعة كلها تنتهي. في الفترة اللي جاية هاكون مشغول بشكل صعب في التكليف و ورقه… و الله أعلم هاتعين فين في أرض المحروسة، و طبعاً انتي عارفة خريجي المنصورة العظام و رغبتهم العارمة في استكشاف حدود الكون… فممكن جداً أكون في كفر النيجر، أو عزبة ماشو بيشو. المهم، في خضم كل الأحداث دي… المجلة كده هاتتظلم جامد، ولا إيه؟
تاني هام، لما اسيب الجامعة، هيبقى حتى عيب عليا إني آخد مكان مش مكاني في عمل طلابي رائع زي اللي انتوا بتعملوه ده… يعني مش هابقى طالب، و بكده هيبقى مش من حقي قوي اني أكتب.. هابقى باخد مكان واحد أولى مني… و انا شايف انه الواحد لازم يتحرك و يوسع مجال للناس علشان تجرب و تطور… ديموقراطياً يعني… بدل ما الواحد يفضل قاعد على الكرسي زي ناس… لما يحمض و يفقد القدرة على العطاء… و ساعتها شكله هايبقى وحششش… كمان علشان العمل يفضل مرتبط بيكم و بحياتكم كطلبة… و ما يحصلش انفصال في مستويات كتير…أنا شايف انكم عملتم شغل هايل في التلات أعداد دول، و دلوقتي معاكم موروث ضخم تحافظوا عليه و تطوروه… انتم.. بإيديكم و إيدين زملائكم… انتشروا رأسيا في الدفعات.. و أفقياً في الدفعة الواحدة… و كونوا قاعدة عريضة من المشاركين و الأفكار الجديدة… و كملوا على الطريق
فيه مشاريع تانية كتير و أفكار نيرة المفروض نختبرها و نجربها… و انا معاكم برأيي و اقتراحاتي على طول… مش هاسيبكم يعني.. لأني شبطة… و عاوزكم متفوقين على طول و أحسن الناس… أنا و الدكتور عبد المنعم بس غرضنا نوسع مكان لغيرنا… علشان دايما يبقى فيه تجديد و تطوير…
أما بقى بالنسبة لكتاباتي و مسألة النشر في جرانين دي… إيدي على كتفك… همم.. ولا بلاش دي ليقولوا باعاكس.. قصدي يعني يا ريت…ده أمل أي حد بيحب الكتابة… كان فيه عرض كده مرة و ما حصلش نصيب… عامة أنا مستمر في الكتابة هنا و في المدونة الانجليزي و يشرفني انكم تقرولي و تستمروا في التواصل معايا… الإيميلي بتاعي معاكم
و دمتم سالمين… لا طظ فيكم